Leja për shfrytëzimin e ujërave termale në Dibër është anuluar. Ky është vendimi i marrë nga Këshilli i Basenit Ujor Drin-Bunë, në prefekturën e Shkodrës në mbledhjen e fundit të tij.
Në një vendim të tij në fillim të muajit dhjetor parashikohej që llixhat e Dibrës të jepeshin me koncesion, por kjo hasi në kundërshtim të madh. Përveç banorëve, edhe deputetët e Dibrës në Kuvend kanë kërkuar që Rama të garantonte publikisht dibranët se kjo nuk duhej të lejohej.
Një ditë më parë ishte vetë Olta Xhaçka, ministrja e Mbrojtjes, njëkohësisht dhe deputete e qarkut që ka paralajmëruar anulimin e vendimit.
“‘Vendimi i Këshillit të Basenit të Ujërave Buna-Drini anulohet. Vendimi i Këshillit të Basenit Drini – Buna na ka shqetësuar të gjithëve. Me prefekturën dhe bashkinë nuk kanë konsultuar për këtë vendim. Vendimi është marrë në mungesë të plotë transparence dhe abuziv. Përfaqësuesit e qeverisë në atë këshill janë përballur me faktin e kryer dhe kanë debatuar kundër vendimit. Nga hetimi administrativ që ka bërë zyra e kryeministrit, vendimi do të anulohet. Përgjegjësit e këtij vendimi do të marrin përgjegjësitë’, tha Xhaçka një ditë më parë.