Ditën e sotme moderatorja Fiori Dardha postoi në Instagram disa foto që ngjallën kureshtjen e publikut, duke paralajmëruar se do të vijë me një projekt të ri së shpejti. Bashkangjitur me fotot, të cilat paraqisnin vajza me pasione të ndryshme në mosha të ndryshme, Fiori shkruan thjesht: “Gocat”, gjë që në bëri të mendojmë se ky projekt do të jetë pikërisht i dedikuar për to.
Moderatorja e “Boom” e ka konfirmuar këtë fakt, duke dhënë edhe disa detaje rreth projektit. Fiori tregon se “Gocat” do të jetë një platformë online, një projekt unik dhe gjithëpërfshirës, ku vajzat do të kenë mundësinë të bisedojnë, debatojnë, do shprehin shqetësimet, do kërkojnë këshilla dhe do të shpalosin aftësitë e tyre. Sipas saj nuk do të jenë protagoniste vetëm personazhet e njohura, por edhe vajza të thjeshta që do të kenë pasion aktorimin, modën apo sportin, të cilat do të vihen përballë situatave të ndryshme dhe do të reagojnë ndaj tyre.
‘”Do shohim gruan në karrierë, zonjën e shtëpisë, nënën e përkushtuar, studenten e shkëlqyer, vajzën çapkëne, zonjushën rebele, miss-in e shoqërisë, të përkëdhelurën e familjes, problematiken e klasës, fashionisten, modesten, të vuajturën, të dashuruarën, të pandreqshmen, histeriken, paranojaken, të guximshmen apo moskokëçarësen“- tregon ajo, teksa thotë se herë me humor, herë me ironi dhe herë në mënyrë dramatike, gocat do të sjellin realitetin që jetojmë të gjitha. Po ashtu ajo ka edhe një ftesë: “Kushdo që ka talent dhe që ka deshirë të kthehet në një personazh publik, do të ketë “GOCAT” si një mundësi drejt suksesit.”
