Milani i këtij sezoni duket se iu është rikthyer ditëve të tij më të lavdishme. Në fakt, për parashikime është ende shpejt, megjithatë kuqezinjtë kanë treguar karakter dhe cilësi në këto gjashtë sfida të para të Serisë A. Sot në mesditë, të besuarit e trajnerit Stefano Pioli, kaluan një provë të rëndësishme teksa fituan në transfertën e Friulit përballë vendasve të Udinezes.
Milani e nisi mirë ndeshjen dhe në minutën e 18 shënuan me Frank Kesi, i cili shfrytëzoi më së miri një passim të Zllatan Ibrahimoviç, i cili është kthyer në inspiruesin e ekipit. Pjesë e parë, Milani e mbylli në avantazh, mirëpo pësuan në të dytën kur Romanjoli shkaktoi një penallti dhe De Paul u tregua i saktë nga 11-metrat.
Gjithsesi, kuqezinjtë nuk u dorëzuan dhe në minutën e 83, gjetën golin e avantazhit me Ibrën. Suedezi shënoi në mënyrën e tij, një realizim që në brendësi kishte shumë akrobaci të cilën 39-vjeçari nuk e ka harruar edhe në këtë moshë. Deri në fund, Milani e ruajti avantazhin dhe në këtë formë mban vendin e parë në Serinë A pas gjashtë ndeshjeve teksa kanë grumbulluar 16 pikë, teksa nuk kanë pësuar ende asnjë humbje.