Gjithçka sot ka kaluar në plan të dytë, përfshirë edhe ndeshja e vlefshme për Europa League dhe vetë kundërshtari Rapid Viena, sigurisht. Madje edhe rezultatet e munguara të një Interi zhgënjyes.
Gjatë ditës së mërkurë, çështja “Icardi” ka sunduar në kampin zikaltër nga mëngjesi e deri në mbrëmje. Pikërisht pasdite, gjatë konferencës për mediat, trajneri i Inter, Luciano Spalletti i ka vënë vulën duke konfirmuar krizën mes klubit dhe sulmuesit argjentinas.
“Vendimi për t’i hequr shiritin e kapitenit Icardit ishte i vështirë, i dhimbshëm, por i përbashkët. E ndërmorëm atë vendim për të mirën e Inter. Përjashtimi nga grumbullimi? Jo, ishte ai që nuk deshi të vinte këtu me ne. Ishte i grumbulluar, por vendosi të qëndrojë në shtëpi”, deklaroi trajneri i Inter, Luciano Spalletti në konferencën për mediat.