Kush nuk do të dëshironte të shikonte filma sa herë të dëshironte. Ka qenë një bisedë mes miqsh dhe 20-vjeçarit shqiptar nga Shkupi, Endrit Rushiti i lindi ideja të krijonte një aplikacion pikërisht për të zbavitur njerëzit.
Ai studion në Fakultetin e Shkencave të Informatikës në Universitetin “Nënë Tereza” në Shkup. Endriti rrëfen për TiranaNews se ideja e aplikacionit të tij “Movies Diary” erdhi nga një bisedë e zakonshme mes miqsh.
“Ideja e aplikacionit ‘Movies Diary’ erdhi duke e pasur si një problem personal dhe shoqëror! Zakonisht, gjatë pushimeve verore dhe dimërore kur nuk jemi në universitet, çdokush shfrytëzon kohën e lirë në mënyra të ndryshme. Unë kisha një shoqëri të interesuar shumë rreth filmave dhe gjithmonë para se ndonjëri nga ne të fillonte të shikonte ndonjë film, pyeste çdonjërin nga ne se vallë e ka shikuar dhe a mund ti japë një sugjerim rreth atij filmit. Problemi gjithmonë ishte tek harresa. Të gjithë shikojmë filma por pas një kohe jo gjithmonë mbajmë në mend emrin e filmit, e aq më pak se si ka qenë filmi ose vallë i ka pëlqyer”, na tregon Endriti 20-vjeçar.
Aplikacioni i tij renditet i katërti në listën Trendings në Kategorinë Entertainment në Google PlayStore. “Aplikacioni ka për synim ti lehtësojë punën të gjithë njerëzve që janë të pasionuar rreth filmave dhe atyre që kanë në plan që të shikojnë disa filma në të ardhmen!”, thotë ai.
Dy fjalë për aplikacionin
Movies Diary të jep mundësinë të kesh një listë të filmave që ke në plan të shikosh, dhe pasi t’i shijosh, mund ti ruash filmat duke i shtuar një vlerësim dhe një përshkrim të shkurtër.
Bëni një listë të filmave që nuk i keni parë për ti parë më vonë duke përdorur aplikacionin. Çdo gjë është e thjeshtuar për përdoruesit për të mos humbur filmat e tyre të dashur.