Liga Profesioniste e Futbollit ka reaguar së fundmi për ngjarjen e paprecedentë të ndodhur në ndeshjen e Kategorisë së Dytë, mes Delvinës dhe Albpetrolit, ku anësori, Elis Pulaj u dhunua duke përfunduar në spital.
Nëpërmjet një reagimi në faqen zyrtare në “Facebook”, Liga Profesioniste dënon ashpër dhunën teksa shkruan se është momenti për të reaguar, gjetur zgjidhje dhe për të mbrojtur komunitetin e madh të futbollit.
REAGIMI I LIGËS PROFESIONISTE TË FUTBOLLIT:
Liga Profesioniste e Futbollit dënon ashpër dhunën e ushtruar ndaj gjyqtarit Elis Pulaj gjatë ndeshjes Delvina-Albpetroli, e vlefshme për javën e 7-të të Kategorisë së Dytë, Grupi B. Kjo ngjarje e rëndë meriton të zbardhet sa më shpejt dhe të vërë para ligjit autorët. Dhuna si një fenonem negativ ka shoqëruar futbollin shqiptar në nivele dhe kategori të ndryshme.Vetëm forca e ligjit, Policia e Shtetit dhe Prokuroria kanë autoritetin për të parandaluar, zbardhur dhe dënuar agresorët që cënojnë futbollin. Ngjarja në Delvinë mund të përsëritet nesër diku tjetër. Vullneti politik për të hartuar ligje dhe zbatuar drejt ato do të parandaloj dhe largoj përfundimisht dhunën nga stadiumet në Shqipëri. Është momenti për të reaguar, gjetur zgjidhje dhe mbrojtur komunitetin e madh te futbollit.
