Kanë nisur debatet dhe përplasjet para protestës së opozitës. Deputeti i Partisë Demokratike Xhemal Gjunkshi ka akuzuar pronarin e linjës së mikrobusëve Peshkopi-Tiranë, Adil Cibaku se ka urdhëruar bllokimin e mjeteve të transportit për datën 16 shkurt 2019.
“Ky person, i cili është akuzuar publikisht, për aferat korruptive në raport me
drejtuesit e mjeteve(shoferëve), të cilët kryejnë çdo ditë këtë rrugë, u merr
dhe vazhdon tu marrë privatisht nga 500 mijë lekë të vjetra në muaj rryshfet
shoferëve të kesaj linje. Së pari kërkojmë: Ndjekjen penale të këtij “Trimi” që
guxon, pengon, abuzon qëllimisht me atë qe ia kanë dhuruar dhe jo merituar. Së
dyti: I kërkoj urgjentisht Ministres së Infrastrukturës dhe Energjisë Znj. Belinda
Balluku, heqjen e licensës firmës “Ariu-Ariu” të përfaqësuar nga Adil Cibaku”,
shkruan deputeti demokrat.
Pronari i linjës së transportit urban Peshkopi-Tiranë dhe kthim, ka hedhur poshtë akuzat e ligjvënësit nga Dibra dhe ka deklaruar se asnjë drejtues mjeti nuk është urdhëruar të mos udhëtojë drejt Tiranës. “Unë, u shpreh Cibaku, kam kërkuar nga shoferët të zbatojnë me korrektësi oraret e lëvizjes, sic është përcaktuar më parë. Zoti Gjunkshi hedh akuza të pavërteta. Unë e kam mbështetur PD-në dhe këtë e kam treguar ndër vite. Gjunkshi ka tentuar ta ketë ai këtë linjë transporti”, nënvizoi Adil Cibaku.