Manchester United po kalon një nga momentet më të bukura të viteve të fundit. “Djajtë e Kuq” fituan 3-2 në shtëpi ndaj Liverpool, sukses që sjell kualifikimin në raundin e 1/8 të FA Cup. Gola dhe spektakël në “Old Trafford”, teksa në fund festuan djemtë e Ole Gunnar Solskjaer, të cilët ndodhen edhe në krye të Premier League.
Momo Salah zhbllokoi takimin pas një asisti të marrë nga Firmonho në minutën e 18-të. Tetë minuta më vonë erdhi goli i barazimit. Rashford nisi Mason Greenwood dhe talenti 19-vjeçar nuk gaboi përballë Alisson. Kaq për pjesën e parë, teksa vendasit e filluan shumë mirë fraksionin e dytë të ndeshjes.
Markus Rashford kaloi United në avantazh në minutën e 48-të, duke përfituar nga pozicionimi i gabuar dhe gafa e mbrojtjes mike. “The Reds” reaguan dhe shënuan një tjetër gol 10 minuta më vonë. Sërish Momo Salah autori, me egjiptianin që finalizoi një aksion shumë të bukur të skuadrës së Jurgen Klopp.
Gjithçka u vendos në minutën e 78-të. Goditje dënimi për United dhe ekzekutim mjeshtëror i Bruno Fernandes. Topi në rrjetë, Manchester United në raundin tjetër dhe krizë te Liverpool. Në sfidat e luajtura gjatë mesditës, u regjistruan fitore e Chelsea, Leicester City dhe Burnley, që siguruan kalimin në 1/8 e FA Cup.