Timo Lule, këngëtari i njohur i këngës qytetare fierake nuk ka mundur të fitojë betejën me koronavirusin.
Ka qenë kreu i bashkisë së Fierit, Armando Subashi që ka dhënë lajmin e trishtë, duke u shprehur se ka lënë pas një pasuri të madhe të këngës qytetare popullore.
“Timo është ndarë fizikisht prej nesh, por ka lënë pas një pasuri të madhe artistike si në interpretim, ashtu dhe në përpunimin e këngës qytetare e popullore, duke i qëndruar besnik tabanit dhe traditës lokale”, u shpreh Subashi.
Libri i tij, “Fieri dhe Kënga”, botuar më 2009, është një tjetër dëshmi që do të transmetojë ndër breza, bashkë me studimin në fushën e folklorit muzikor e historisë, edhe emrin e bilbilit të këngës qytetare fierake, besnikut të traditës, Timo Lule.