Kryetarja e Lëvizjes Socialiste për Integrim Monika Kryemadhi ka zhvilluar ditën e sotme një takim me qytetarët në Prrenjas, ku ka dëgjuar nga afër shqetësimet e tyre.
Ndryshe nga herët e tjera, Kryemadhi ka pasur në krah deputeten e opozitës në Parlament Suzana Topi, e cila doli nga listat e LSI dhe pranoi mandatin e deputetit.
Më saktë, pas Enver Roshit që mori mandatin e Edmond Haxhinastos, Topi zuri vendin e Monika Kryemadhit nga lista e Elbasanit.
Në atë kohë, Kryemadhi reagoi me një gjuhë shumë të ashpër ndaj deputetëve të rinj, duke i akuzuar si “dele të zeza” dhe të blerë nga kryeministri Edi Rama.
Kryetarja e LSI thoshte se ata që pranuan mandatin nuk i njohin si deputet të dalë nga partia e saj dhe se nuk do t’i njohin ata.
“Jo të gjithë njerëzit kanë të njëjtin integritet, ka nga ata që janë trima, ka nga ata që kërcënohen, ka nga ata që kanë të kaluar të errët. Nuk i njohim më dhe nuk janë pjesë e LSI-së. I kemi dërguar edhe një letër KQZ-së”, tha Kryemadhi kohë më parë.