Vetëm pak ditë pasi fitoi Superkupën e Italisë ndaj Napolit, Juventus do të përballet sërish me “të kaltrit” këtë herë për kampionat në stadiumin “Diego Armando Maradona”.
Tekniku i bardhezinjve Andrea Pirlo doli sot në konferencën e zakonshme për shtyp, ku pranoi rëndësinë e sfidës dhe deklaroi se dëshiron një tjetër sukses, për t’u shtuar presionin edhe skuadrave milaneze që kryesojnë.
“Na pret një ndeshje shumë e vështirë, pasi Napoli ka një skuadër shumë cilësore, me individë që mund të zgjidhin situatat në çdo moment. Do të provojmë t’u japim vazhdimësi ndeshjeve të mira të javëve të fundit dhe të marrim një tjetër sukses, pasi kështu mund t’u shtojmë presionin edhe skuadrave që kemi para vetes në renditje”, deklaroi Pirlo.
Napoli po kalon një moment të vështirë, pasi përveç eliminimit nga Kupa e Italisë, nuk ka vazhdimësi as të rezultateve në kampionat, ndërsa pozitat e trajnerit Gattuso janë lëkundur ndjeshëm së fundi, por kjo nuk i intereson aspak ish shokut të tij te Milani, Andrea Pirlos.
“Situata e Gattusos është një situatë normale për të gjithë trajnerët. Më vjen keq për të, por më duhet të mendoj për problemet e mia, pasi na duhet fitorja, që t’u japim vazhdimësi rezultateve”, u shpreh tekniku bardhezi.