Përfaqësuesja e Zvicrës vazhdon të tregojë se pa shqiptarët në përbërjen e saj, do ta kishte të vështirë të siguronte rezultate të rëndësishme në arenën ndërkombëtare. Kjo, jo vetëm falë kontributit të emrave si Shaqiri, Xhaka, Mehmedi apo Behrami në ekipin e të rriturve, por edhe për atë që japin të rinjtë shqiptarë në ekipet e moshave.
Kështu, përfaqësuesja U21 e Zvicrës, sot ka nisur pjesëmarrjen e saj në fazën në grupe të Europianit të kësaj grupmoshe me një fitore të rëndësishme ndaj Anglisë, me shifrat 1-0. Një sukses, pjesë të cilit ishin edhe katër shqiptarë që veshin ngjyrat e Zvicrës në këtë turne.
Toni Domgjoni, Bastien Toma dhe Andi Zeqiri ishin të tre titullarë në sfidën e sotme përballë Anglisë, ndërsa në pjesën e dytë të lojës u aktivizua edhe Kastriot Imeri, duke shtuar praninë e lojtarëve me origjinë shqiptare në fushën e lojës.
Për tre emrat e parë prej vitesh, flitet për kalimin e tyre në radhët e Kosovës e për disa tentativa edhe nga Shqipëria për t’i bërë të veshin fanellën kuqezi, por ata për momentin kanë shfaqur interesim që të qëndrojnë te Zvicra, duke zgjedhur të përfaqësojnë helvetët në arenën ndërkombëtare.