Lajme te mira për Shqipërinë nga kampi i Anglisë. “Tre Luanët” e drejtuar nga Garet Sauthgejt, do të kenë dy elementë cilësorë më pak në radhët e tyre për sfidën e të dielës, dy lojtarë të fazës ofensive të cilët sigurisht do t’i krijonin probleme prapavijës së kuqezinjve.
Markus Rashford ka lënë sot grumbullimin e përfaqësueses angleze, për t’u kthyer te Mançester Junajtid. Sulmuesi anglez ka probleme fizike e kështu, është vendosur që të vazhdojë procesin e riaftësimit në klubin e tij meqë nuk do të jetë i gatshëm për duelet kundër Shqipërisë e Polonisë në ditët në vijim.
Ndërkohë, Bukajo Saka kishte qëndruar këto ditë te Arsenali duke shpresuar që të ishte i riaftësuar për duelin ndaj Shqipërisë. Por problemet e tij fizike nuk e lejojnë të jetë i pranishëm në ndeshjet e Anglisë, e kështu, i është bërë e qartë që të mos i bashkohet grumbullimit.
Sauthgejt ka vendosur që të mos grumbullojë lojtarë të tjerë për t’i zëvendësuar, duke menduar se ka elementë të mjaftueshëm për të përballuar ndeshjet e ardhshme.