Real Madrid do t’i duhet që të bëjë shumë më mirë sesa sot në Londër, në ndeshjen e kthimit të gjysmëfinaleve të Ligës së Kampioneve, nëse do të kthehet përsëri në finalen e turneut pas dy viteve mungesë. Skuadra e drejtuar nga Zinedin Zidan është ndalur në barazimin 1-1 nga Çelsi në sfidën e sotme në Madrid, e do t’i duhet që të shkojë në Angli me idenë për të tundur rrjetën e fituar sfidën.
Ndeshja e sotme ishte shumë e bukur vetëm në pjesën e parë me skuadrat që sulmuan e shënuan. Fillimisht ishte Çelsi që gjeti rrjetën me Pulishiç e më pas madrilenët u përgjigjën me anë të Benzema. Por vetëm kaq, pasi pas 30 minutave lojë, ritmi ra sepse dy skuadrat u treguan shumë të kujdesshme për të mos pësuar më.
Kështu, sfida u mbyll me golat e 30 minutave të para të sfidës dhe me Çelsin shumë të lumtur pasi ka një avantazh të rëndësishëm për të administruar në kthimin në shtëpi. Ndërsa Reali duhet të shpresojë në kthimin e disa elementëve të rëndësishëm të skuadrës që të shtojë forcën ofensive e të pretendojë diçka më shumë në Londër për kualifikimin në finale.