Dënim skandaloz i Komisionit të Disiplinës/ Koka e zëvendëstrajnerit të Kombëtares vlen 100 mijë lekë (Video)

Komisioni i Disiplinës në Federatën Shqiptare të Futbollit ka dhënë sot një vendim të turpshëm për ngjarjet në stadiumin e Laçit, duke treguar kësisoj se do të vazhdojë të tolerojë çfarëdo ngjarje të dhunshme që buron nga kurbinasit, siç ka ndodhru më parë edhe me çështjen e Nuabuezes. Në ndeshjen ndaj Partizanit, tifozët që në teori nuk duhej të ishin në tribunë, goditën me shishe në kokë trajnerin e portierëve të Partizanit e njëkohësisht të Kombëtares shqiptare të futbollit, Ilir Bozhiqi.

Një ngjarje e turpshme dhe sigurisht po aq e rëndë. Por jo për Komisionin e Disiplinës i cili me urdhër nga lart, në mënyrë skandaloze ka vendosur që për këtë situatë, Laçi të dënohet me vetëm 100 mijë lekë gjobë, duke i vënë kështu një çmim kokës të çdokujt që mund të rrezikojë në të njëjtën mënyrë në stadiumin e skuadrës kurbinase.

Një qëndrim i qartë që tregon se në këtë fund sezoni, FSHF mund të lejojë çfarëdolloj akti dhune në stadiume dhe një paralajmërim se në javët e ardhshme, mund të ketë bëma të tjera të ngjashme.

Vendimet e Komisionit të Disiplinës dhe Etikës së FSHF datë 30.04.2021

1. KF Tirana, në bazë të nenit 12 të KDS, paralajmërohet se në rast të përsëritjes së dështimit në përmbushjen e detyrimeve dhe përgjegjësive, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
2. KF Laçi, për dështim në përmbushjen e detyrimeve dhe përgjegjësive duke mos garantuar sigurinë e zyrtarit të klubit kundërshtar, në bazë të neneve 63/1/c, dhe 64/1 të KDS, dënohet me gjobë në masën 100.000 (njëqind mijë) lekë.
3. Akademia e Futbollit, për braktisjen e ndeshjes së vlefshme për Kampionatin Kombëtar të Kategorisë Superiore U-21, kundër KF Bylis, në bazë të nenit 54/1 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
4. Shënkolli, për braktisjen e ndeshjes së vlefshme për Kampionatin Kombëtar të Kategorisë Superiore U-13 – Grupi A, kundër KF Vllaznia, në bazë të nenit 54/1 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
5. Lojtari i Vora U-17, Emiljano Brahimaj, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.
6. FK Apolonia U-17, në bazë të nenit 12 të KDS, paralajmërohet se në rast të përsëritjes së dështimit në përmbushjen e detyrimeve dhe përgjegjësive, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
7. Lojtari i FK Dinamo, Nico Paterni, për sjellje josportive ndaj kundërshtarëve, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.
8. Lojtari i Tibo 5×5, Ergi Laze, për sulm ndaj zyrtarit të ndeshjes, në bazë të nenit 48/1/b të KDS, dënohet me 12 (dymbëdhjetë) muaj pezullim nga aktiviteti.
9. Tibo, për shkak të ndërprerjes përfundimtare të ndeshjes së vlefshme për Kampionatin Kombëtar të Futbollit 5×5 kundër Royal, në bazë të neneve 30/1 dhe 30/4/a të KDS, humbet ndeshjen në tavolinë me rezultatin 3-0.
10. Grade Up, për aktivizimin e lojtarit që nuk kishte të drejtë të luante në ndeshjen e vlefshme për Kampionatin Kombëtar të Futbollit 5×5, kundër Primo, në bazë të neneve 30/3 dhe 53 të KDS, humbet ndeshjen në tavolinë me rezultatin 0-3 dhe i zbriten 3 pikë nga klasifikimi.
11. Pranimin e kërkesës së kërkuesit Erando Karabeci. KF Tirana, për dështim në ekzekutimin e vendimit nr. 36, datë 05.11.2020 të Dhomës Kombëtare të Zgjidhjes së Konflikteve, në bazë të nenit 62/1/a të KDS, i jepet një afat paralajmërues prej 30 (tridhjetë) ditësh për të ekzekutuar vendimin.