Federatës Shqiptare të Futbollit i del gjumi! Institucioni i futbollit, pasi ka qepur gojën e nuk ka guxuar as të bëjë një reagim sa për sy e faqe për ngjarjet e dhunës në Kategorinë Superiore, e aq më tepër të dënojë dhunuesit në mënyrën e përshtatshme, sot është zgjuar për një ngjarje të Kategorisë së Dytë.
Sfida është ndërprerë pas goditjes së një gjyqtari në ndeshjen Sopoti-Mirdita që po luhej në Cërrik, incident që ka sjellë ndërprerjen e takimit. Ky ishte momenti ideal që institucioni i futbollit të bënte propagandën e zakonshme se është i shqetësuar e po lufton dhunën në futbollin e vendit tonë e që padyshim do të shoqërohet me një masë shembullore për klubin e Kategorisë së Dytë.
Kjo është një tjetër mënyrë për të bërë propagandë me ndeshjet e kategorive të ulëta, teksa nuk guxon të marrë asnjë masë për ngjarjet që ndodhin gjithmonë e më shpesh në ndeshjet e elitës që shfaqen në TV çdo javë e janë të dukshme për të gjithë për t’u parë. Rritja e rasteve dhe përshkallëzimi i tyre, është padyshim edhe gjumi i deritanishëm i FSHF-së, që ka lejuar fajtorët t’ia hedhin pa u lagur, e tashmë këto pasoja po i vuan i gjithë futbolli shqiptar.
REAGIMI I FSHF
Federata Shqiptare e Futbollit dënon incidentin e ndodhur gjatë ndeshjes KF Sopoti-KF Mirdita, e vlefshme për javën e 23-të të Kategorisë së Dytë, Grupi A dhe që luhej në stadiumin e Cërrikut.
Në minutën e 44-t, një lojtar i Mirditës ka goditur gjyqtarin e takimit, duke sjellë edhe ndërprerjen e takimit.
Organet e drejtësisë sportive do të mblidhen me urgjencë për këtë ngjarje kaq të rëndë, e cila njollos gjithë futbollin.
I bëjmë thirrje drejtuesve të klubeve dhe lojtarëve të respektojnë rregullat “fair play”, të shmangin dhe të parandalojnë akte të tilla të dhunshme, që nuk duhet kurrsesi të kenë vend në futboll.