Studimi më i ri i Universitetit të Harvardit thotë se dhuna fizike ndaj fëmijëve dhe veçanërisht goditjet në kokë përveç traumës fizike dhe mendore që shkakton, ndikon në funksionimin dhe zhvillimin e trurit.
Studimi, i botuar së fundmi në revistën Child Development, bazohet në studime ekzistuese që tregojnë rritjen e aktivitetit në zona të caktuara të trurit të fëmijëve që kanë përjetuar abuzim fizik si ndëshkim.
Ekipi hulumtues zbuloi se fëmijët që u goditën kishin një përgjigje më të madhe nervore në shumë zona të korteksit paraballor (PFC). Këto zona të trurit i përgjigjen sinjaleve të kërcënimit dhe mund të ndikojnë në vendimmarrjen dhe përpunimin e situatës.
“Ne e dimë që fëmijët familjet e të cilëve përdorin ndëshkimin fizik kanë më shumë të ngjarë të zhvillojnë ankth, depresion, probleme të sjelljes dhe probleme të tjera të shëndetit mendor. “Në këtë studim, ne donim të shikonim nëse kishte ndonjë efekt të rrahjes në një nivel neurobiologjik, në lidhje me mënyrën se si zhvillohet truri”, thanë studiuesit.