Në ambientet e Këshillit Bashkiak të Bulqizës ditën e sotme është zhvilluar një takim për mbrojten e territorit.
Në këtë takim morën pjesë drejtuesit e bashkive të qarkut Dibër, prefekti Nexhbedin Shehu, drejtori vendor i policisë dhe specialistë të pyjeve, mjedisit dhe IMT-ve të bashkive.
Gjatë këtij takimi janë trajtuar problematika lidhur me prerjen e jashtëligjshme të pyjeve, ndërtimet pa leje, lumenjtë, guroret dhe varrezat e makinave.
Bashkia Bulqizë njofton se në fund të këtij diskutimi u përcaktuan objektiva dhe qëllime për t’u realizuar.
Kujtojmë që ditët e fundit, Policia e Qarkut Dibër ka raportuar raste të njëpasnjëshme të goditjes së prerjes së paligjshme të pyjeve dhe ndërtimeve pa leje, duke nisur procedime penale ndaj disa personave.
Ky aksion vjen në kuadër të angazhimit të qeverisë për mbrojtjen e territorit, lidhur me të cilën, pak ditë më parë kryeministri Edi Rama dhe ministri i Brendshëm, Bledi Çuçi paralajmëruan shembje të të gjitha objekteve pa leje përgjatë vijës bregdetare. Gjithashtu më herët ata patën paralajmëruar ashpërsim të kontrolleve dhe njëkohësisht edhe të dënimeve deri në 15 vite për ata që kapen duke ndërtuar pa leje.