Pak ditë me parë Christian Eriksen pësoi atak kardiak në mes të fushës teksa luhej ndeshja Danimarkë-Finlandë në kampionatin Europian 2020.
Zemra e tij pushoi së rrahuri për disa minuta por ishte ndërhyrja e shpejtë e shokut të tij të ekipit Simon Kjaer i cili e mbajti në jetë falë ndihmës së parë dhe masazhit të zemrës që i bëri dhe më pas Eriksen u transportua me urgjencë në spital. Ndërkohë pasi kanë kaluar disa ditë, ai e ka kaluar pjesën më të vështirë, ku iu nënshtrua një operacioni në zemër. Mjekët i kanë vënë një defibrilator, i cili shërben për stabilizimin e rrahjeve të zemrës. Sakaq Eriksen ndodhet në shtëpi, megjithatë po ngrihen pikëpyetje në lidhje me të ardhmen e tij në futboll, pasi ende nuk dihet saktësisht nëse do mundet më të luajë apo jo.
Në lidhje me këtë ka folur edhe mbrojtësi holandez Daley Blind që ka të njëjtën problem si Eriksen, edhe ka në zemër një defibrilator, ndërsa aktualisht luan me Ajax.
“Shikoni ku jam sot. Këtë dua t’ju them të gjithëve. Lëreni Christian të qetë. Unë u riktheva në fushë sapo stafi më dha dritën jeshile për ta bërë këtë gjë. Nuk kisha arsye për të mos luajtur përsëri në nivele të larta. Gjëja e vetme, është që të largoja nga koka të gjitha deklaratat, gjithçka që kishte të bënte me mua dhe të vazhdoja përpara. Nuk kisha frikë! Isha i lumtur që po rikthehesha e të luaja përsëri. Sapo mjekët më thanë që tani mund të luash, e bëra menjëherë, lashë prapa të gjithë frikën dhe tensionet”, tha ai.