Grupi B i Euro 2020, me rezultatet e sotme, ka bërë të mundur që të mësohet përfundimisht jo vetëm emri i 2 skuadrave që shkojnë direkt nga ky grup në fazën në 16-she, por edhe ka mundësuar që 5 ekipe të tjera të njihnin fatin e tyre dhe të kishin garancinë matematikore se do të vazhdonin në 16-she, pavarësisht pozicionimit për t’u përcaktuar në grupin përkatës.
Fakti se vendi i tretë në këtë grup, Finlanda, e mbylli me 3 pikë dhe me golavarazh -2, kombinuar edhe me situatën e Ukrainës që ka po 3 pikë dhe golavarazhin -1, ka sjellë garancinë se skuadra nga grupe të tjera, edhe nëse dalin të tretat, do të kenë të sigurt praninë e tyre në turin tjetër pasi kanë 4 pikë dhe në rastin më të keq do të kualifikohen ndër katër të tretat më të mira.
Kështu, biletën pa luajtur e kanë prerë edhe Republika Çeke, Anglia, Suedia dhe Franca, të gjitha në kuotën e 4 pikëve dhe që kanë për të luajtur ndeshjet e tyre në ditët në vijim. Gjithashtu, atyre u shtohet edhe Zvicra e cila tashmë është e sigurt se do të jetë ndër katër të tretat më të mira të Euro 2020 dhe siguron biletën për kalimin e turit.
Kësisoj, ka shkuar në 11 numri i ekipeve të kualifikuara dhe të cilat janë Italia, Uellsi, Zvicra, Belgjika, Danimarka, Holanda, Austria, Republika Çeke, Anglia, Suedia dhe Franca. Këtyre pritet t’u shtohen në dy ditët në vijim edhe 5 skuadra të tjera për të formuar 16-shen, si dhe të plotësohet hierarkia në grupe për të caktuar kalendarin e përballjeve.