Pronari i një subjekti në Durrës është ndëshkuar me 1 milion lekë, pasi po ushtronte aktivitetin e tij pas orarit të përcaktuar të mbylljes në kuadër të masave anti-covid. Bëhet fjalë për lokalin në pronësi të shtetasit me inicialet H.D., në lagjen nr.13.
Gjithashtu, specialistët për Hetimin e Krimeve në Komisariatin e Policisë Shijak proceduan penalisht shtetasin V. K., 40 vjeç, banues në Shijak, pasi u konstatua nga shërbimet e Policisë, duke vijuar aktivitetin në subjektin e tij në Maminas, jashtë orarit të përcaktuar për mbyllje, në kundërshtim me aktin normativ.
Drejtoria Vendore e Policisë Durrës apelon për të gjithë administratorët e lokaleve dhe qytetarët që të respektojnë masat anticovid dhe orarin e përcaktuar për ushtrimin e aktivitetit.