Federata e Futbollit të Italisë (FIGC) po u bën presion klubeve, që lojtarët e Serisë A dhe Serisë B të vaksinohen para fillimit të sezonit të ri. Kampionati i edicionit 2021-22, për Serinë A nis më 22 gusht, kohë në të cilën duhet të përfundojë vaksinimi i futbollistëve, raporton “Corriere dello Sport”.
Sakaq disa klube si Roma, Sampdoria dhe Fiorentina, kanë filluar vaksinimet. Lazio po mendon ta kryejë këtë procedurë, ndërsa shumë klube të tjera janë duke pritur. Sipas raportit, FIGC po kërkon ta bëjë vaksinimin të detyrueshëm, për të parandaluar përhapjen e rasteve të reja dhe shtyrjen e mundshme të ndeshjeve gjatë sezonit të ri.
Futbollistët e kombëtares së Italia, si dhe stafi teknik i Roberto Mancinit, para fillimit të “Euro2020” u vaksinuan që të gjith kundër virusit Covid-19. Kjo po përdoret edhe si një shembull bindës për pjesën e futbollistëve, të cilët hezitojnë ta kryejnë këtë procedurë me efekte mbrojtëse shëndetësore.
Për momentin, edhe në ekipet sportive në Itali, ka një shpërthim të vazhdueshëm të Covid-19, si fjala vjen në rastin e Spezias, ku 10 lojtarë dhe një anëtar i ekipit, rezultuan positive dhe janë karantinuar.