Një aksident i rëndë është regjistruar mesditën e sotme në rrugën me kalldrëm që të çon drejt Kalasë së Beratit. Dy të rinj, Suela dhe Erald Xhafa, kanë qenë zbritur me motor nga Kalaja në drejtim të qytetit, por janë përplasur me një mjet tip “Benz”, që ndodhej i parkuar në anë të rrugës.
Përplasja ka qenë shumë e fortë dhe dy të rinjtë kanë përfunduar pa ndjenja në tokë. Të plagosurit Suela dhe Erald Xhafa janë transportuar drejt Spitalit Rajonal në Berat në gjendje të rëndë.
Mjekët e spitalit të Beratit konfirmojnë se gjendja e tyre është tejet kritike dhe ata pasi i kanë dhënë ndihmën e parë mjekësore, po i përgatisin për t’i transportuar me ambulancë drejt Spitalit të Traumës në Tiranë. Policia ka shkuar në vendngjarje dhe po punon për zbardhjen e plotë të rrethanave të aksidentit.