Hyjnë sot në fuqi masat e reja anti-Covid në Kosovë, të cilat u vendosën për shkak të rritjeve të rasteve të infektimeve.
Ditën e djeshme në vend u shënua rekord i zi, pasi që brenda 24 orëve u shënuan 36 viktima nga COVID-19, shifër kjo e cila ishte më e larta që nga fillimi i pandemisë në mars të vitit 2020. Duke marrë shkas nga kjo shifër, qeveria bëri hapa pas duke bërë këto kufizime.
Në mesin e masave të reja është kthyer edhe ora policore për të gjithë qytetarët që fillon prej orës 22:00 deri në ora 05:00. Maska është e detyrueshme gjithandej, përveç në tri raste: Gjatë drejtimit të automjetit vetëm, apo kur në automjet janë prezentë vetëm anëtarët e ngushtë të familjes; Gjatë vrapit, çiklimit dhe ushtrimeve fizike dhe; Gjatë ngrënies apo pijes.
Fillimi i vitit shkollor është shtyer deri më datën 13 shtator. Po ashtu, është ndaluar shërbimet në gastronomi në hapësirat e mbyllura. Qëndrimi i klientëve (shërbimi i ushqimit dhe pijeve) lejohet vetëm në hapësirat e hapura të lokaleve të gastronomisë. Lejohet shfrytëzimi i jo më shumë se 70 % e kapacitetit të hapësirës së hapur. Sipërfaqja llogaritet për zonën ku shërbehet ushqimi dhe pijet.