Luan Rama e cilësoi Partinë Socialiste si shtëpinë e tij të lindjes politike dhe askush nuk mund të kushtëzojë raportet që ai mund të vendosë me këtë parti.
Ish-nënkryetari i LSI-së, i dorëhequr pak ditë më parë la të hapur mundësinë e rikthimit në politikë, edhe te PS, ndërsa tha se aktualisht ka një projekt gati për t’iu rikthyer gazetarisë.
“Partia Socialiste është partia ime e lindjes dhe nuk kam pse t’i marr askujt leje në raportin tim me PS. Jam socialist në bindje dhe qëndrim. E kam për nder atë që tha Kryeministri që të jem mbrojtës i gjithë vlerës së luftës”, tha Rama në një intervistë për News24.
“Sot jam i papunë si shumë të papunë këtu dhe nuk jam nga ata politikanë që profesion nuk kam. Jam në tundimin për t’iu kthyer profesionit të parë. Kam paraqitur një projekt dhe jam në kontakte me disa subjekte mediatike për të parë se sa i vlefshëm është projekti im dhe nëse do të gjej dakordësinë do t’i kthehesha me kënaqësi profesionit si gazetar”, tha ai.