Qeveria ka vendosur të riorganizojë përfaqësimin e Shqipërisë në negociatat për anëtarësimin në Bashkimin Evropian, duke ndryshuar emrat e disa prej negociatorëve dhe duke rishpërndarë përgjegjësitë për kapituj të ndryshëm të legjislacionit evropian.
Ndryshimet janë miratuar në mbledhjen e Këshillit të Ministrave më 12 nëntor dhe përfshijnë përfaqësues të ministrive, si dhe drejtues të institucioneve të pavarura që janë pjesë e Grupit Negociator.
Një prej lëvizjeve kryesore prek Kapitullin 22, që ka të bëjë me Politikën Rajonale. Për këtë kapitull, negociator do të jetë zëvendësministri i Brendshëm, Oltjon Muzaka, i cili merr këtë detyrë nga ministri i Shtetit për Pushtetin Vendor, Ervin Demo.
Riformatime ka edhe në grupin që mbulon çështjet ekonomike dhe financiare. Zëvendësministrit të Ekonomisë dhe Inovacionit, Enkelejd Musabelliu, i është besuar edhe Kapitulli 6, që përfshin të drejtën e shoqërive tregtare. Në të njëjtën kohë, vendimi heq ngarkimin e mëparshëm të ish-zëvendësministres Blerta Rama për kapitujt 4 dhe 6.
Për Kapitullin 4, që lidhet me lëvizjen e lirë të kapitalit, si bashkënegociator përfshihet zëvendësministri i Financave, Andi Memeti. Ndërsa Endrit Yzeiraj do të ketë përgjegjësi edhe për dy kapituj të tjerë: Kapitullin 9, për shërbimet financiare, dhe Kapitullin 17, që mbulon politikën ekonomike dhe monetare.
Në procesin negociues do të angazhohen edhe drejtues të institucioneve të pavarura. Zëvendësguvernatorja e dytë e Bankës së Shqipërisë, Natasha Ahmetaj, do të jetë bashkënegociatore për kapitujt 4 dhe 17. Ndërkohë, drejtoresha e Përgjithshme Ekzekutive e Autoritetit të Mbikëqyrjes Financiare, Adela Xhemali, do të vijojë të jetë pjesë e ekipit për Kapitullin 9.
Edhe fusha e konkurrencës do të ketë një ndarje të re të përgjegjësive. Kryetari i Autoritetit të Konkurrencës, Denar Biba, do të bashkëpunojë me zëvendësministrin e Ekonomisë dhe Inovacionit, Mario Keputa, për negociatat mbi Kapitullin 8.
Ndryshime janë parashikuar edhe në grupet që mbulojnë bujqësinë dhe shëndetësinë. Zëvendësministrja e Bujqësisë, Tana Kika, do të jetë bashkënegociatore me Arian Jaupllarin për Kapitullin 12, që përfshin sigurinë ushqimore. Në sektorin e shëndetësisë, Denada Seferi do të vijojë të mbulojë Kapitullin 19, ndërsa Eugena Tomini do t’i bashkohet ekipit negociator për Kapitullin 28, që përfshin mbrojtjen e konsumatorit dhe shëndetin publik.
Vendimi synon të përcaktojë një ndarje të përditësuar të përgjegjësive brenda strukturës që drejton dhe koordinon negociatat e Shqipërisë me Bashkimin Evropian. Për zbatimin e tij janë ngarkuar Grupi Negociator i Republikës së Shqipërisë dhe institucionet përkatëse.