Hakera të sponsorizuar nga shteti i Koresë së Veriut kanë vjedhur më shumë se 400 milionë dollarë në kriptomonedha, duke përdorur video-thirrje të rreme për të përvetësuar identitetin e njerëzve, bëjnë të ditur autoritetet amerikane.
Sipas Byrosë Federale të Hetimit (FBI), më shumë se 900 persona kanë rënë pre e kësaj skeme gjatë 18 muajve të fundit. Agjencia e ka emërtuar operacionin mashtrues “FaceStealer”.
“Regjimi i Koresë së Veriut mbështetet te të ardhurat nga vjedhjet masive të kriptomonedhave për të financuar programin e tij të paligjshëm të armëve, pasi ka përvetësuar miliarda dollarë gjatë viteve të fundit”, deklaroi Brett Leatherman, drejtor i sektorit të sigurisë kibernetike në FBI.
Zbulimi vjen vetëm një javë pasi Binance, bursa më e madhe e kriptomonedhave në botë, bëri të ditur se hakerë kishin përdorur intervista të rreme pune për të vjedhur një shumë rekord prej 6.3 miliardë dollarësh.
Autoritetet amerikane të zbatimit të ligjit ia kanë atribuar sulmin ndaj Binance, që konsiderohet si sulmi më i madh kibernetik ndaj një platforme kriptomonedhash deri më sot, grupeve të lidhura me Korenë e Veriut. Pheniani i ka mohuar këto akuza.
Sipas autoriteteve, skema më e fundit, e njohur si “FaceStealer”, shënjestron në mënyrë agresive personat që punojnë në sektorin e kriptomonedhave dhe të teknologjisë Web3, veçanërisht ata që merren me zhvillimin dhe mirëmbajtjen e programeve me kod të hapur.
Sipas FBI-së dhe Departamentit amerikan të Drejtësisë, hakerët përdorin llogari të rreme ose të vjedhura në rrjetet sociale për të ftuar viktimat e mundshme në video-thirrje, të cilat zhvillohen përmes versioneve të falsifikuara të platformave Zoom, Microsoft Teams dhe Google Meet.
Gjatë këtyre telefonatave, hakerët shfaqin video të regjistruara më parë me persona që viktima i njeh, duke krijuar përshtypjen se bëhet fjalë për një bisedë të vërtetë. Megjithatë, gjatë komunikimit, audioja paraqitet sikur ka probleme teknike, duke krijuar mundësinë që mashtruesit të ndërhyjnë dhe të vjedhin identitetin e viktimave.
Më pas, në ekranin e viktimës shfaqet një mesazh që i kërkon të “rregullojë” audion duke klikuar në një lidhje. Ky proces i rremë shkakton shkarkimin e një programi keqdashës (malware) në pajisjen e përdoruesit, duke u mundësuar hakerëve të kenë akses në listën e kontakteve dhe aplikacionet e tij. Në këtë mënyrë, ata zgjerojnë rrethin e personave që mund të bëhen viktima të mashtrimit.
Sipas autoriteteve amerikane, hakerët i regjistrojnë fshehurazi këto video-thirrje dhe më pas i përdorin regjistrimet për të mashtruar viktima të reja.
FBI e ka cilësuar FaceStealer si “një skemë tejet efektive të manipulimit psikologjik, e aftë të mashtrojë edhe përdoruesit më me përvojë të kompjuterëve, përfshirë ata që kanë njohuri të avancuara teknike dhe të sigurisë”.
“Kjo skemë shfrytëzon besimin tonë te platformat e përdorura gjerësisht për video-konferenca dhe te marrëdhëniet personale që i vlerësojmë”, deklaroi të enjten Patrick Grandy, zëvendësdrejtor përgjegjës për zyrën rajonale të FBI-së në Los Anxhelos.
“Nëse nuk arrini të imagjinoni një situatë në të cilën mund të bini pre e këtij mashtrimi, atëherë nuk po mendoni në mënyrë mjaftueshëm krijuese.”
