Përveç situatës politike, në vendimin e qershorit për hapjen e negociatave të Shqipërisë mund të ndikojë edhe rezultati i zgjedhjeve të Parlamentit Europian. Sipas zv/ministrit të Jashtëm, Shqipëria i ka plotësuar prioritetet kyçe dhe është në pritje të axhendës europiane të zgjerimit. Zgjedhjet e Parlamentit Europian në muajin maj mund të ndikojnë në politikën e zgjerimit të Unionit. Zëvendëministri i Jashtëm, Sokol Dedja, shprehet optimist për plotësimin e 5 prioritetve kyçe të vendit tonë, ndërsa në lidhje me vendimin e qershorit duhet të pritet nga rezultatet e zgjedhjeve të PE-së.
Sokol Dedja tha se: “Mbetet për tu parë sesi do të jetë përbërja e parlamentit të ardhshëm, nëse do të kemi një rritje të madhe të forcave eurospektike, anti-BE.Sigurisht kjo krijon një klimë jo të favorshme për procesin e zgjerimit”.
Ashtu siç ka reagur edhe Brukseli, zëvendësministri mendon që situata politike nuk është produktive për vendin tonë.
Dedja shtoi në fjalën e tij: “Është kundërproduktive, mund të ketë pasoja negative. Pavarësisht se fokusi është te plotësimi i kritereve specifike për hapjen e negociatave që janë 5 përparësitë kyçe”.
Në shtator pritet të përfundojë faza e parë e procesit screening, ku do të bëhet i mundur përafrimi i legjislacionit shqiptar me atë të Bashkimit Europian pothuajse në të gjitha fushat. Pas hapjes së negociatave pritet të niset edhe faza e dytë e screening.