Kryeministri Edi Rama e ka nisur mëngjesin e sotëm me publikimin e disa pamjeve nga puna që po bëhet për transformimin e Piramidës në Tiranë, e cila do të shndërrohet në qendrën më të madhe të Inovacionit Teknologjik në rajon.
Rama uron një të diel të bukur me pamjet nga punimet që po vijojnë nën mbikëqyrjen e arkitektit të famshëm hollandez Winny Mass.
“Mirëmëngjes dhe me këto detaje të punës që vijon për transformimin e Piramidës në qendrën më të madhe të Inovacionit Teknologjik në rajon, nën mbikqyrjen e arkitektit të famshëm hollandez Winny Mass, ju uroj një të diel të bukur”, shkroi Rama.
Projekti i rivitalizimit të Piramidës së Tiranës synon transformimin e saj në një qendër multifunksionale në qytet, duke siguruar hapësirë për të rinjtë dhe qytetarët që të angazhohen në art, kulturë dhe teknologji krijuese. Plani synon të krijojë simbolin e ri për Tiranën, ku ndërtesa është e arritshme nga të gjitha anët.