Shoqata deklaron se arbitrave u rrezikohet jeta dhe se nuk do të rikthehen deri kur policia e shtetit të rikthehet në stadiume. Kujtojmë që sot Kamza u përjashtua nga gara.
Futbolli
shqiptar në kaos. Shoqata Bashkimi i Arbitrave të Futbollit Shqiptar ka
vendosur që të bojkotojë kampionatin pas dhunës ndaj gjyqtarit kryesor në ndeshjen
Kamza-Laçi. Shoqata deklaron se arbitrave u rrezikohet jeta dhe se
nuk do të rikthehen deri kur policia e shtetit të rikthehet në stadiume.
Kujtojmë që sot Kamza u përjashtua
nga gara.
Deklaratë për shtyp
Shoqata Bashkimi i Arbitrave të Futbollit Shqiptar, e tronditur pas ngjarjes së
dhunës ekstreme ushtruar ndaj gjyqtarit Eldorjan Hamiti në Kamëz, ka marrë sot
vendimin e saj për të bojkotuar ndeshjet e futbollit në nivel kombëtar.
Duke parë që nga java e parë e kampionatit dhe deri në të fundit ne ndjehemi të
pasigurtë, sot ne vendosëm të themi: Mjaf! Mjaft më me kërcënime, fyrje e
sharje. Mjaft (dhe kjo është shumë më serioze dhe e rrezikshme) me dhunë e
ç’është më e rëndësishmja, mjaft më me pasiguri për jetën.
Njëzëri arbitrat mendojnë se eksperimenti i deritanishëm për largimin e
Policisë së Shtetit nga stadiumet e futbollit ka dështuar. Zëvëndësimi i tyre
me polici private është një dështim tjetër tashmë i konsumuar. Ashtu siç nuk
kemi se ç’të presim më edhe nga eksperimenti tjetër i zbatimit të ligjit, i
cili ka dështuar plotësisht, përderisa autorët e dhunës janë liruar sot, edhe
se pamjet filmike janë shumë të qarta dhe media ka katër ditë qe e ka në qëndër
të vëmëndjes këtë ngjarje.
I kërkojmë klubeve anëtare në FSHF të na mirëkuptojnë dhe të na mbështesin në vendimin që ne kemi marrë, kjo sepse vendimi që ne kemi marrë është e vetmja rrugë që gara të jetë sa më e vërtetë dhe korrekte. Mjaft u eksperimentua. Ne kemi vendosur të mos luajmë me jetën tonë. Kështu nuk do të kthehemi për të gjykuar, deri sa të ndjehemi të sigurtë dhe Policia e Shtetit të kthehet në stadiume dhe autorët e dhunës të ndëshkohen. Shoqata Bashkimi i Arbitrave të Futbollit Shqiptar