Kreu i grupit parlamentar demokrat Alfred Rushaj ka kërkuar ndryshimin e rendit të ditës për të nisur me rastin e rëndë të helmimit masiv në Krujë, të cilën ai e quajti papërgjegjshmëri.
“Sot ne paraqitëm kërkesën të firmosur nga dhjetë deputetë, dhe kërkojmë të ndryshojmë rendin e ditës dhe të vendoset si pikë e parë diskutimi për situatën emergjentë të krijuar nga ndotja e ujit të pijshëm në Bashkinë e Krujës. Mendojmë që Kuvendi e ka detyrim që të diskutojë për këtë ngjarje të rëndë që ka çuar në dëmtime masive do të thoja të shëndetit të qytetarëve në këtë bashki”, tha Rushaj.
Por ndërkohë kreu i grupit parlamentar socialist, Taulant Balla tha se nuk mund të kërkohet ndryshimi i rendit të ditës për këtë ngjarje, pasi janë organet kompetente që kanë nisur hetimet.
“Sigurisht që siç raportohet gjithashtu dhe prokuroria dhe policia e shtetit po bëjnë hetime gjithëpërfshirëse për t’i shkuar në fund kësaj ngjarjeje. Nuk e di që Kuvendi ka atributet të bëjë qoftë hetime penale qoftë hetime të karakterit mjekësor, këto do i bëjnë autoritetet shtetërore. Unë besoj që deri javën e ardhshme, qoftë ministrja e Shëndetësisë me të gjithë strukturën e saj, qoftë ministri i Brendshëm apo struktura të tjera shtetërore do të jenë në gjendje ti bëjn Kuvendit një informacion të plotë. Përsa i përket sugjerimit tim mbi kërkesën pa mbulim në rregulloren e Kuvendit, mund të kërkosh ndryshimin e rëndit të ditës për një projektligj”, tha Balla.