Nëse mendoni se këtë fundjavë nuk do të shihni në fushat e futbollit gjyqtarët e Shoqatës që vendosi bojkotin e aktiviteteve kombëtare, gaboheni plotësisht, pasi “xhaketat e zeza” do të zbresin në fushë, edhe pa bekimin e saj e të FSHF-së, por sidomos pa praninë e policisë.
Thuajse të gjitha klubet e Superiores, Kategorisë së Parë dhe të Dytë kanë vendosur që të organizojnë ndeshje miqësore për këtë fundjavë, si zëvendësim për kampionatin, për të mbajtur futbollistët në formë. Thuajse të gjitha këto ndeshje do të kenë gjyqtarë të cilët aderojnë në Shoqatën Bashkimi i Arbitrave Shqiptarë të Futbollit, me përjashtim të disave që do të drejtohen nga gjyqtarë të cilët sapo janë afruar në kolegjiumet e qyteteve përkatëse dhe janë në hapat e parë të këtij profesioni.
Një vendim që bie ndesh me atë që shpalli kryesia e Shoqatës që urdhëroi gjyqtarët të fusin në xhep bilbilin këtë javë, e që tregon qartësisht se bojkoti i kampionatit ishte thjesht një “shfaqje”.
Të njëjtët gjyqtarë të cilët shoqata pretendon se kanë frikë për jetën e tyre, kanë vendosur që në këto ndeshje të fundjavës të arbitrojnë miqësoret ku sigurisht mungon policia, apo edhe numri i caktuar e stjuardëve siç kërkon rregullorja. Në rastin e Tirana-Korabi do të luhet edhe me dyer të hapura për të gjithë tifozët. A do të rrezikonin më shumë në ndeshjet e kampionati?