Presidenti Ilir Meta ka komentuar sërish deklaratat e kryedemokratit Basha në adresë të tij, duke mos lënë mënjanë ironinë. Meta thotë se nuk ka asnjë hall, por edhe nëse do të kishte, zgjidhja nuk do të ishte në dorën e Bashës.
Sakaq, ai ka rrëfyer edhe raportet me Bashën, duke treguar se ky i fundit ka qëndruar së bashku me familjen disa herë në shtëpinë e Metës.
“Zoti Berisha vetëm një herë ka qenë në shtëpinë time. Zoti Basha, nëse do t’i numëroja ditët ka qenë me muaj të tërë, me familjen, me vajzat, më shumë se kushdo politikan tjetër ne shtëpinë time. Ndaj kur e dëgjova para pak kohësh për herë të parë z.Basha mendova mos e kishte me deputetin socialist të Vlorës, Ilir Metaj. Unë nuk kam patur dhe nuk kam asnjë hall, ndaj nëse ngelem në dorën e z.Basha për të zgjidhur hall, askush mos e zëntë halli në këtë botë”, tha ai.
Sakaq, Meta ka lënë të hapur mundësinë e bashkëpunimit me PD, ndonëse thekson se bindjet e tij nuk përputhen me të djathtën.
“Unë jam shumë i hapur për të bashkëpunuar me Partinë Demokratike, dhe si një ish-student i Lëvizjes së Dhjetorit, pavarësisht se bindjet e mia nuk përputhen me të djathtën”, u shpreh Presidenti Meta.