Stadiumi “Air Albania Stadium” do të presë të shtunën e 11 dhjetorit delegatë dhe mbështetës të PD, në Kuvendin Kombëtar të thërritur pikërisht nga ish-kryeministri.
Bëhet me dije se pritet që të jenë të pranishëm në stadium rreth 5 mijë delegatë të Partisë Demokratike, që do të jenë të pozicionuar në njërën anë të godinës, raporton BW. Nga ana tjetër, rreth 15 mijë priten të jenë mbështetës të partisë. Sipas gazetarit, gjatë këtij Kuvendi priten të votohen një sërë ndryshimesh statutore, e më pas, do të votohet edhe për shkarkimin e kryetarit aktual të PD, Lulzim Basha.
Po ashtu, pritet që persona të caktuar të mbajnë fjalime, por deri më tani, nuk ka raportime për emra. Sakaq, vlen të theksohet se një javë më pas, më 18 dhjetor, do të ketë një tjetër Kuvend, kësaj here të thërritur nga Lulzim Basha me vendim kryesie. Kjo sipas kryedemokratit, ka ardhur si një thirrje nga anëtarët, që kanë qenë të interesuar për t’u mbledhur e shprehur pëlqimet, por edhe problematikat e tyre, si dhe do të përcaktohet aksioni politik që do të ndiqet në të ardhmen.