Dhjetëra qytetarë presin çdo ditë me orë të tëra nëpër qendrat shëndetësore të Tiranës për të kryer analizën për Covid-19 për të parë nëse janë të infektuar apo jo.
Mungesa e testeve të Covid-19 është kthyer në një problem në Qendrat Shëndetësore në kryeqytet, duke bërë që çdo ditë aty të mblidhen një numër i madh qytetarësh dhe situata duket se rëndohet së tepërmi pas ditëve të pushimeve zyrtare, duke bërë që të ketë vonesa në shërbim.
Ndërkohë, punonjësit e këtyre qendrave shëndetësore shprehen se nuk ka teste Covid-i, pasi e hanë ka qenë pushim.
Nga ana e tyre, qytetarët shprehen të revoltuar, pasi sipas tyre vijnë edhe për dy ose tre ditë resht, mbajnë radhën deri vonë dhe në fund të ditës dalin pa e bërë tamponin.
“Kam vajzën me 40 temperaturë. Kemi ardhur për të bërë testin, erdhja dje në 11, Qendra ishte e hapur dhe nuk kishte teste. Dhe sot që në 8:30 dhe presim” u shpreh një banor për Ora News.