Kuvendi i Kosovës ka miratuar vendimin e Qeverisë për masat e emergjencës në furnizimin e energjisë.
Me 57 vota për dhe 17 abstenime, legjislativi ia dha dritën e gjelbër vendimit qeveritar.
Pas dështimit të djeshëm, mazhorancës i dhanë përkrahje përmes abstenimit edhe disa deputetë nga PDK-ja dhe AAK-ja.
Në seancën e jashtëzakonshme, ditën e djeshme ku u shqyrtua propozimvendimi në fjalë, ministrja e Ekonomisë, Artane Rizvanolli argumentoi se Qeveria ka vendosur për masa të emergjencës në furnizim të energjisë elektrike, të cilat do të vlejnë maksimalisht 60 ditë.
Ajo theksoi se sipas vendimit të qeverisë, masat emergjente në furnizim me energji përfshijnë: vendosjen e kufizimeve në furnizim me energji për konsumatorët, dhe vendosjen e obligimeve të veçanta për ndërmarrjet e energjisë.
Për këtë propozim pati debat mbi 3 orë me akuza dhe kritika nga deputetët e opozitës për krizën energjetike në vend.