Pas zyrtarizimit të evazionit të lartë në tregun e punës, që u faktua me publikimin e listës së pagave, qeveria i ka lënë afat biznesit deri në 20 janar që të vetkorrigjohet, çka nënkupton deklarimin real të rrogave.
Por në fakt administrata tatimore nuk ka një mekanizëm imponues për bizneset, ndërsa monitorimi deri në detaj i të ardhurave dhe shpenzime për kompanitë mbetet i vështirë. Ndaj kontabilistët i druhen aplikimit të pagave referencë si dhe selektivitetit në kontrollet që do të ushtrohen.
Qeveria thotë se fiskalizimi ul ndjeshëm mundësinë e evazionit, por me shtyrjen sërish të këtij afati për biznesin e vogël, mbetet e vështirë të monitorosh xhiron reale të biznesi, për të evidentuar madhësinë e evazionit.
Pas datës 20 janar tatimet pritet të nisin kontrolle tek ato biznese, që kanë deklarime pagash të ulta, por aksione të tilla janë kryer edhe më herët.
Nga rreth 700 mijë të punësuar, rreth 40 % e tyre rezultojnë se paguhen me pagë minimale prej 30 mijë lekësh, niveli më i lartë i evazionit në tregun e punës se çdo vend tjetër i rajonit.