Alfred Rushaj dha dorëheqjen dje nga kreu i Grupit Parlamentar të Partisë Demokratike, duke shënuar kështu një tjetër largim nga radhët e mbështetësve të Lulzim Bashës.
Largimi i tij mësohet se ka ardhur si shenjë pakënaqësie ndaj vendimeve të fundit të Lulzim Bashës për të përjashtuar një numër të madh deputetësh nga PD.
E nëse kjo është e vërtetë, atëherë Basha, jo vetëm që ka humbur një nga bashkëpunëtorët e tij më të ngushtë, por ka humbur edhe shumicën e deputetëve në Qarkun e Tiranës.
Nga 15 deputetë që Partia Demokratike mori në zgjedhjet e 25 Prillit në Tiranë, tashmë zyrtarisht ka vetëm 4 prej tyre, ndërkohë që 6 të tjerë janë pjesë e grupit të Sali Berishës. 5 janë deputetë të partive aleate që garuan në listat e PD-së.
Më konkretisht, përveç vetes, në këtë Qark, Bashës i ka mbetur Jorida Tabaku, Grida Duma dhe Orjola Pampuri.
Ndërsa ish-kryeministri Sali Berisha ka mbështetjen e deputetëve Belind Këlliçi, Albana Vokshi, Agron Shehaj, Flamur Noka dhe siç duket që dje, edhe të Alfred Rushajt.
Ndërkohë, partitë aleate përfaqësohen në këtë Qark me deputetët: Dashamir Shehi, Fatmir Mediu, Vangjel Dule, Mesila Doda dhe Shpëtim Idrizi.
Në këtë mënyrë, të paktën në Tiranë, Basha ka humbur të drejtën e përfaqësimit të opozitës kryesore.