Është mbyllur në barazim sfida mes Napolit dhe Interit. Edhe pse ndeshja kishte shumë raste, përsëri skuadrat nuk shkuan më shumë se rezultati 1-1.
Napoletanët e nisën vrullshëm sfidën dhe arritën të kalonin në avantazh që në minutën e 7-të. De Vrij ndërhyri brenda zonës në mënyrë të parregullt ndaj sulmuesit Osimhen dhe pas konsultimit me VAR-in, arbitri akordoi penallti. Nga pika e bardhë kapiteni Lorenzo Insigne u tregua i saktë. Në pjesën e parë vendasit ishin më kërkues dhe patën disa raste për të shënuar, ndërsa zikaltrit nuk arritën të ishin të rrezikshëm.
Në pjesën e dytë Interi barazoi rezultatin me Edin Dzeko. Sulmuesi boshnjak përfitoi nga një top i mbetur në zonë dhe shënoi golin e barazimit. Minutat e mbetura prodhuan disa raste, por rezultati nuk ndryshoi.
Me këtë barazim Interi mbetet në vendin e parë me 54 pikë dhe Napoli në të dytin me 1 pikë më pak. Megjithatë Milani mund të marrë kryesimin sepse ndodhen në kuotën e 52 pikëve dhe një fitore ndaj Sampdorias do t’i “katapultonte” në krye të Serisë A.