Guvernatori i Bankës së Shqipërisë, Gent Sejko ka raportuar këtë të mërkurë në Komisionin e Ekonomisë dhe Financës. Ai falenderoi Kuvendin që e propozoi dhe Presidentin Meta që e dekretoi për një mandat të dytë si guvernator të Bankës së Shqipërisë.
Sejko tregoi më pas të gjithë punën e bërë nga institucioni që drejton, në këto vite që ka qenë në krye të saj, ku renditi të gjitha sfidat dhe sukseset.
“Dua t’ju falënderoja për prezantimin korrekt për zgjedhjen time si kryetar i këshillit mbikëqyrës. Unë kam filluar karrierën në vitin 1992, pranë bankës kombëtare tregtare, si përgjegjës sektori i kreditit. Më pas kam qenë në Bankën e Shqipërisë, deri në ’98-ën, ku kam qenë me ndërprerje për të kryer studimet në Britani. Kam punuar disa firma private më pas. Jam rikthyer në Bankën e Shqipërisë në vitin 2004, e më pas kam punuar në nivele drejtues në banka të tjera. Në pamundësi për të bërë një rezyme të plotë për këto 7 vite, që kanë marrë vlerësim pozitiv. Misioni kryesor i BSH është stabiliteti i çmimeve. Politika monetare ka bërë një hov të dukshëm cilësor.
Rezultatet e këtij investimi janë të prekshme. BSH ka monitoruar në mënyrë korrekte kreditë me probleme. Këto kanë zbritur në nivelin 4.5%. Po aq i rëndësishëm është fakti sa rreziku i kredive është ulur. Ky plan masash ka dhënë efekte pozitive. BSH ka administruar me sukses konsolidimin e procesit bankar. Ky proces ka synuar dhe arritur jo thjesht reduktimin e Bankave Tregtare, por mbi të gjitha procesi ka arritur futjen në tregun lokal të aktorëve të motivuar. Në pasqyrim të kësaj pune BSH është anëtare e bankave qendrore. Kemi kuadër funksional në hyrjen në banka. Këto përpjekje kanë dhënë frytet e tyre. Sektori bankar mori me vete një pjesë të madhe të pasojave të pandemisë. Sektori bankar diti të kryej këtë funksion pa cënuar kapitalizmin e saj. Publiku gjen në sistemin bankar një vend të sigurt për ruajtjen e pasurisë së tij”, tha Sejko.