Shqipëria vijon axhendën e takimeve për të kordinuar lirimin e brezit frekuencor 700 MHz (njohur si DD2).
Kryetarja e Autoritetit të Mediave Audiovizive, Armela Krasniqi dhe delegacioni i AMA-s ishte në një vizitë zyrtare në Kroaci për të diskutuar me homologët kroatë mbi koordinimin e planit frekuencor dhe harmonizimin e parametrave teknikë.
Kryetarja e AMA-s, Krasniqi falënderoi palën kroate për organizimin e shpejtë të këtij takimi dhe për angazhimin në këtë proces tejet të vështirë nga pikëpamja e koordinimit teknik.
Palët diskutuan mbi pikat në të cilat dy vendet kanë çështje për të zgjidhur në vijim të koordinimit të frekuencave të brezit UHF dhe brezin III – VHF.
U dakordësua që të vijojë bashkëpunimi në harmonizimin e parametrave teknikë të rrjeteve kombëtare shqiptare me qëllim arritjen e pajtueshmërisë midis allotmenteve të Tiranës dhe Dubrovnikut (D09).
Pala kroate u dakordësua në parim me planin frekuencor të Shqipërisë dhe do të vijojë punën me administratën e AMA-s për harmonizimin e parametrave teknikë për të shmangur interferenca në të ardhmen. Kroacia ishte një ndër vendet e fundit në rajon që nuk kishte dhënë dakordësinë e saj për planin frekuencor shqiptar.
Më herët, kryetarja e Autoritetit të Mediave Audiovizive ndërmori një axhendë takimesh me vendet fqinjë në rajon për shkak të rëndësisë së këtij procesi, si dhe afateve të afërta në kohë për realizimin e tij.
Në vijim të kësaj, në Tiranë u nënshkruan deklarata dypalëshe dakordësie me Maqedoninë e Veriut, Malin e Zi dhe me Kosovën. Kjo do të pasohet me marrëveshjet përkatëse për lirimin e brezit frekuencor dhe finalizimin e këtij procesi brenda afateve të përcaktuara në aktet ndërkombëtare. Me nënshkrimin e “Deklaratës së Përbashkët” institucionale për lirimin e brezit të frekuencave 700 MHz, palët nënshkruese konfirmuan arritjen e një plani të përputhshëm të frekuencave ndërmjet administratave përkatëse mbi koordinimin e frekuencave numerike tokësore, në brezin 470-694 MHz.
Shqipëria për planin e saj frekuencor DD2 ka marrë miratimin edhe të Italisë e Greqisë.