“500 milion euro mbështetje për energjinë”, Gjiknuri-Berishës: Me politikën e korbave nuk vini dot në pushtet. Tregove se je furnitori politik i protestës

Qeveria po bën gjithçka për të mbështetur qytetarët shqiptarë. Kështu deklaroi në seancën e sotme parlamentare Sekretari i Përgjithshëm i PS, Damian Gjiknuri. Nga foltorja e parlamentit, Gjiknuri nënvizoi se qeveria ka blerë 500 mln euro vetëm për energjinë me qëllim mbështetjen e konsumatorëve. “Berisha vazhdon me politikën e vdekjes. Nxori që ka qenë furnitori politik i njerëzve në protesta. Kur njerëzit injektohet politikisht, duke mos njohur shkaqet e vërteta të krizës, kjo do të thotë që mos ta duash këtë vend, ti vësh flakën këtij vendi. Mos bëjmë naivin këtu. E dimë shumë mirë që efekti do të ishte në të gjithë botën. Qeveria po bën atë që ka mundësi! Po përdorim financat publike për të zbutur krizën”, tha Gjiknuri.
Deputeti Gjiknuri nënvizoi se Berisha në fund të qeverisjes së tij e la sektorin energjetik të zhytur në borxhe që i ngjasonte një kufome energjetike.
“Ju e latë sektorin energjetik, ti vet le një kufomë energjetike. Janë bërë shumë vite që nuk mungon furnizimi me energjinë elektrike. Unë kam qenë promotor që tregu të liberalizohet. Qeveria ka marrë një risk të madh dhe këto taksa që thoni ju, ka dhe borxhe që i keni lënë, ju. Ne kemi ndjekur interesin publik kundër parimeve të tregut, kemi arritur të mbrojmë edhe biznesin e madh. Të harxhosh 500 mln euro për energji mbështetje, kush e ka bërë këtë? Ne e kemi bërë. Kjo qeveri ka bërë gjithçka që ka në dorë. Mund të ketë edhe rritje të tjera çmimesh. Me politikën e korbave do të vini në pushtet? Kjo është papërgjegjshmëri. Ne do ju vijmë në ndihmë qytetarëve, pa prishur elementët bazë që mban ky shtet’, theksoi Gjiknuri.