Në ceremoninë e certifikimit ishte i pranishëm Drejtori i Përgjithshëm i Policisë së Shtetit Gledis Nano.
Mesditën e sotme, në ambientet e Akademisë së Sigurisë, u zhvillua ceremonia e certifikimit të drejtuesve të Policisë, të cilët fituan gradën “Drejtues i Parë”.
Në ceremoni ishte i ftuar, krahas pedagogëve të Akademisë së Sigurisë, edhe profesori i kriminologjisë Ervin Karamuço, i cili, së bashku me dy kolegë të tij, u angazhuan vullnetarisht gjatë trajnimit, duke dhënë leksione, me qëllim rritjen e mëtejshme të performancës së lidershipit në Policinë e Shtetit.
Drejtori i Përgjithshëm Gledis Nano, gjatë fjalës së tij, theksoi: “Sot, ju kurorëzuat me sukses mundin, sakrificën dhe përkushtimin e treguar gjatë gjithë karrierës suaj policore, sepse grada “Drejtues i Parë” është grada më e lartë që fitohet me konkurs në Policinë e Shtetit. Uroj që në detyrat që do të kryeni, të tregoni lidershipin që presin dhe duan qytetarët, në krye të strukturave policore në të gjithë vendin.”
Ervin Karamuço, theksoi se kjo filozofi e re, për të bërë pjesë të Policisë së Shtetit, kapacitetet intelektuale civile, është forma e duhur për të transformuar Policinë, nga një forcë represive në një forcë civile, garante të ligjit dhe të besueshme për qytetarët.
Në përfundim të ceremonisë, Drejtori i Përgjithshëm Gledis Nano, së bashku me zv.drejtorin e Përgjithshëm të Policisë së Shtetit Albert Dervishaj dhe Drejtorin e Akademisë së Sigurisë Bilbil Memaj, iu dorëzoi certifikatat dhe gradat e reja, pjesëmarrësve në këtë trajnim.