Ditën e sotme është publikuar lista me 420 kandidatët, nga të cilët do të zgjidhen 15o anëtarët e Këshillit Kombëtar të Partisë Demokratike.
Deri tani, janë tre persona, emrat e të cilëve janë përfshirë në listë, të cilët kanë deklaruar se nuk kishin dijeni në lidhje me kandidimin e tyre.
Regjizori Kastriot Çipi, me anë të një statusi në rrjetin social Facebook, ka sqaruar se dijeni për përfshirjen e emrit të tij në listë, ka marrë vetëm nga portalet.
Ai tha se shpreson që kjo nuk është lista përfundimtare dhe emri i tij të mos jetë vërtetë i përfshirë në fletët zyrtare të votimit, proces që do të kryhet nesër.
“Te nusja hanë e pinë, te dhëndri gjë nuk dinë…
Një listë kandidatësh për Këshillin e ri Kombëtar të PD, për habinë time, përfshika edhe emrin tim, me numrin rendor 247.
Nuk e di kush e ka përpiluar listën dhe nuk e di a është listë paraprake, me propozime, apo listë zyrtare kandidatësh.
Di që unë nuk kisha dijeni, derisa e pash emrin në portale. Uroj të jetë një keqkuptim dhe fleta zyrtare e votimit nesër, të mos e përmbajë emrin tim. U uroj suksese të gjithë kandidatëve të rinj!”, ka shkruar ai.
Dy personat e tjerë të cilët deklaruan se nuk kishin dijeni për përfshirjen në lista, ishin Vesel Koçiu, ish kryetar i Sarandës dhe artistja, Bleona Qereti.