Një i ri shqiptar është rrëmbyer, rrahur dhe më pas grabitur pasi nuk kishte paguar paratë e drogës. Pas ngjarjes, policia italiane ka vendosur në pranga dy nga katër autorët që morën peng shqiptarin.
Të arrestuarit janë dy shqiptarë të moshës 27 dhe 30 vjeç.
Ndërsa dy të tjerët, të cilët janë vëllezër mes tyre janë të moshës 30 dhe 33 vjeç dhe mendohet se janë arratisur nga Italia.
I riu u sulmua në dhjetor të vitit të kaluar teksa ecte në qendër të Loanos në Itali. Hetimet zbuluan se i riu shqiptar kishte blerë marijuanë te katër personat në vitin 2017 dhe u detyrohej atyre në shumën një mijë euro.
Ai u kishte premtuar se do t’ua jepte më pas por që në fakt nuk arriti t’i paguajë dhe të katër personat filluan të kërkonin paratë duke e kërcënuar derisa arritën ta rrëmbejnë dhe më pas e kanë rrahur dhe e kanë grabitur duke i marrë paratë që kishte me vete.