Tashmë janë vendosur dhe skuadrat finaliste të UEFA Conference League, ku Roma dhe Feyenoord do të përballen së bashku në Tiranë, më 25 maj, në stadiumin “Air Albania”, i cili ka një kapacitet prej 21,690 vendesh.
Lidhur me këtë event historik dhe madhështor ka patur një reagim edhe nga kryeministri i vendit tonë, Edi Rama. Përmes një postim në “Facebook”, Rama u shpreh se ndjehet krenar për kushtet e Shqipërisë për të pritur një ndeshje nga një turne prestigjioz të krijuar nga UEFA.
Postimi i plotë:
“Kush e mendonte deri para pak vitesh, kur Kombëtarja e Shqipërisë emigronte jashtë se s’kishte stadium të pranuar nga FIFA/UEFA për ndeshjet e shtëpisë?!
Po nuk është vetëm stadiumi, është imazhi i Shqipërisë, niveli i Sigurisë, shërbimit, ushqimit,nami ndërkombëtar i Tiranës, që janë sot pakrahasimisht më mirë se sa deri para disa vitesh dhe siç më tha një nga të dërguarit e UEFA-s, “Ne jemi të lumtur të kontribuojmë, që njerëzit në Europë ta mësojnë se sa rrënjësisht ndryshe është Shqipëria nga perceptimi i krijuar për vendin tuaj në kohë të këqija”.