Zv/ministri i Brendshëm, Andi Mahila ishte sot në Vlorë ku vizitoi Gjëndjen Civile të qytetit, nga ku dha dhe një prononcim për gazetarët. Ai u pyet nga këta të fundit edhe për ngjarjen e rëndë në komisariatin e Kavajës, ku një i ri dyshohet se i dha fund jetës.
Mahila u shpreh se për momentin çështja është nën hetim dhe duhet pritur që të dalin rezultatet. Por, zv/ministri nënvizoi se reagimi nga strukturat në varësi të ministrisë së Brendshme ka qenë i menjëhershëm.
“Kjo është një çështje në hetim, dhe kur është në hetim pritet të dalin rezultatet. Ajo që di të them është strukturat e varësisë së Ministrisë së Brendshme, dhe Agjencia e Mbikëqyrjes Policore kanë vepruar në mënyrë të menjëhershme për të nisur hetimet. Kanë dalë vlerësimet paraprake, të presim deri në fund…” , tha ai.