Ka nisur protesta paqësore e lajmëruar nga Partia Demokratike nën moton “Stop vrasjes në komisariate”, pas vdekjes së të riut Ilvi Meta në Kavajë. Qyteti i parë në të cilin demokratët kanë dalë në shesh ka qënë Fieri, ndërsa protestë është parashikuar në të gjithë vendin.
Demokratët do të protestojnë para të gjitha komisariateve të policisë në vend, ndërsa është thënë se në godinën e Kryeministrisë do të ndizen qirinj.
“Ne orën 20.00 pranë të gjitha komisariateve të policisë në të gjithë vendin do të ndizen qirinj në një protestë të heshtur paqësore nën moton “Stop vrasjes në komisariate”. Në Tiranë qirinjtë do të ndizen tek Kryeministria, po në orën 20.00. Ftojmë mediat në Tiranë dhe në rrethe të ndjekin këtë protestë të heshtur”, thuhet në njoftimin e PD-së.