Ditën e sotme në Gollobordë është organizuar kampionati i “Kupës së Mundjes Tradicionale të Gollobordës”.
Kjo festë që tashmë është kthyer në një traditë ka mbledhur bashkë shumë shqiptarë nga vendi ynë, por gjithashtu edhe nga Kosova, Maqedonia e Veriut, Zvicra e Gjermania. Nën kujdesin e kryebashkiakut të Bulqizës Lefter Alla, në bashkëpunim me Shoqatën Sportive “Golloborda” dhe Shoqatën Kombëtare të Mundjes Shqiptare u organizua kampionati i mundjes, ku në fund u shpall fitues Arjan Dani.
Gjatë këtij kampionati mundje, kishte edhe aktivitetet të tjera si vallet popullore të cilat u kërcyen nga një grup vajzash të shkollës së mesme Ostren, gjithashtu një ekspozitë me fotot e mundësve të Gollobordës dhe Dibrës, prezantim i veshjeve dhe traditës së zonës si dhe vizitë në Muzeun e Shkollës së Mesme “Elez Koçi” dhe në “Palestrën e Mundjes”.
Në këtë aktivitet sportiv morën pjesë edhe veteranë dhe ish sportistë nga Njësitë Administrative Ostren, Trebisht dhe Steblevë.
Kryebashkiaku Lefter Alla ka ndarë në “Facebook” foto nga aktiviteti i sotëm. Gjatë fjalës së tij, mësohet se Alla është shprehur se prej shumë vitesh Ostreni mirëpret me me qindëra sportdashës të mundjes, të cilëve i ofron mundësinë që të përballen me njëri-tjetrin.
Sipas Allës, banorët e zonës kanë bërë të mundur që ky sport të kthehet në një festë të vërtetë.