Kupa e Shqipërisë ishte e vetmja shpresë për Vllazninë për të marrë biletën e fundit për në Conference League.
Shkodranët nuk arritën të ishin në katër vendet e para të kampionatit për të siguruar një vend në Evropë, por kuqeblutë e shpëtuan sezonin duke mundur Laçin 2-1 në finalen e Kupës.
Ekipi i drejtuar nga Mirel Josa e pa veten në disavantazh që në minutën e 5, me Guindo që finalizoi me gol një kundërsulm të bukur të laçianëve.
Përgjigjja e Vllaznisë erdhi shumë shpejt, në minutën e 19, me Hoxhën që barazoi shifrat me një gol të bukur me kokë, vetëm pak minuta pasi kishte zëvendësuar Da Silvën.
90 minutat u mbyllën në barazim 1-1, me Vllazninë që e gjeti golin e fitores në shtesë, me një gol nga jashtë zone të Adilit.